2024-cü ilin iyununda kluba qoşulan Arne Slot ilk mövsümündə komandanı İngiltərə çempionluğuna daşıyaraq "Liverpul"un tarixində 20-ci liqa titulunu qazandırıb. O, həmçinin komandanı Liqa Kubokunun finalına və UEFA Çempionlar Liqasının 1/8 final mərhələsinə çıxardıqdan sonra 2024/25 mövsümünü İngiltərə Məşqçilər Assosiasiyasının (LMA) "İlin məşqçisi" mükafatı ilə başa vurub.

2025/26 mövsümündə isə Slotun rəhbərliyi altında "Liverpul" ardıcıl ikinci dəfə UEFA Çempionlar Liqasına vəsiqə qazanıb və turnirin 1/4 final mərhələsinə qədər irəliləyib.

Klubun sahibləri birgə bəyanatda Arne Slotun iki il ərzində qazandırdığı uğurları və nümayiş etdirdiyi liderliyi yüksək qiymətləndiriblər:

"Bu qərarın klub üçün nə qədər çətin olduğunu xüsusi vurğulamağa ehtiyac yoxdur. Arnenin bizimlə olduğu müddətdə "Liverpul"a verdiyi töhfə böyük, dəyərli və həm azarkeşlər, həm də bizim üçün ən vacibi uğurlu olub. Bu səbəbdən ona minnətdarlığımız sonsuzdur. Onun fəaliyyəti yüksək iş etikası, məsuliyyətli yanaşma və peşəkarlıqla müşayiət olunub ki, bu da onun öz sahəsinin aparıcı simalarından biri olduğunu bir daha sübut edib.

Arne ilə ilk tanışlığımızdan etibarən onun məsuliyyəti sadəcə qəbul edən deyil, onu böyük həvəslə üzərinə götürən bir şəxs olduğu aydın görünürdü. Bu, onun baş məşqçi vəzifəsini qəbul etməsində, komandanı Premyer Liqa çempionluğuna aparmasında və geridə qalan mövsüm ərzində qarşılaşdığı ciddi çətinliklərə baxmayaraq göstərdiyi fəaliyyətində özünü büruzə verdi.

Bununla yanaşı, biz birlikdə klubun irəliyə doğru inkişafını davam etdirməsi üçün dəyişikliklərin zəruri olduğu qənaətinə gəldik. Yenə də qeyd etməliyik ki, bu qərar tələsik və ya asanlıqla qəbul edilməyib. Arneyə minnətdarlığımızı bir daha ifadə etmək istəyirik. O, "Liverpul"un tarixində klubun 20-ci liqa titulunu qazandıran məşqçi kimi həmişə xüsusi yer tutacaq. Bu nailiyyət onun ilk mövsümündə əldə olunduğu üçün daha da təsiredicidir və hər gün nümayiş etdirdiyi yüksək səviyyəli məşqçilik və liderliyin nəticəsidir. O, həmçinin Dioqonun itkisi sonrası klubun tarixindəki ən çətin dövrlərdən birində komandaya rəhbərlik edib. Həmin müddətdə göstərdiyi mərhəmət və insanpərvərlik onun şəxsiyyəti haqqında çox şey deyir.

Bu səbəbdən Arneyə məşqçilik karyerasının növbəti mərhələsində uğurlar arzulayırıq və onun bundan sonra da uğurlar qazanacağına inanırıq. Biz bunu onun "Liverpul"dakı irsinin qorunduğunu və gələcək illər ərzində daha da dəyər qazanacağını bilərək edirik. Bununla belə, gəldiyimiz nəticə ondan ibarətdir ki, komandanın inkişaf trayektoriyası üçün yeni istiqamətə ehtiyac var. Bu, Arnenin burada gördüyü işləri və ya ona olan hörmətimizi azaltmır. Eyni zamanda bu qərar onun bacarıqlarının qiymətləndirilməsi deyil, sadəcə fərqli yanaşmaya ehtiyacın göstəricisidir.

Arne klubdan bizim minnətdarlığımızla, Premyer Liqa çempionu statusu ilə və özü ilə ailəsinin hər zaman "Enfild"də xoş qarşılanacağını bilərək ayrılır".

Qeyd edək ki, 47 yaşlı niderlandlı mütəxəssis əvvəllər vətənində "Kambuur", "Alkmaar" və "Feyenoord" klublarını çalışdırıb.

Aydın